Установа культуры «Слонімскі раённы краязнаўчы музей імя І.І. Стаброўскага»

Музей быў адкрыты 20 верасня 1929 г. як прыватны. Яго заснавальнік - Іосіф Іосіфавіч Стаброўскі. У 1939 годзе музей атрымаў статус дзяржаўнага. Экспазіцыя музея размешчана ў 9 залах. Яна прадстаўлена аддзеламі прыроды і гісторыі. У аддзеле прыроды можна пазнаёміцца з фізіка-геаграфічнай характарыстыкай краю, карыснымі выкапнямі, убачыць рэшткі жывёл ледавіковага перыяду, сучасны жывёльны і раслінны свет раёна. У аддзеле гісторыі прадстаўлены найбольш цікавыя прадметы археалагічных раскопак, якія праводзіліся ў Слоніме, матэрыялы па гісторыі войнаў. Музейны збор налічвае 29392 адзінкі захоўвання (2012). Найбольш каштоўнымі з'яўляюцца археалагічная, нумізматычная і этнаграфічная калекцыі. Да ўнікальных экспанатаў адносяцца каменны ідал X ст., «Статут Вялікага Княства Літоўскага» (Польшча, 1648 г.), бюст Напалеона работы французскага скульптара Р. Каломба (бронза, 1885 г.). Музей прапаноўвае культурна-адукацыйныя праграмы «Спадчына горада над Шчарай» і «Горкая памяць вайны», экскурсіі па экспазіцыі «Рэдкая кніга і ікона», якая працуе ў выставачнай зале музея па адрасе: вул. Савецкая, 10.
Першы нацыянальны форум "Музеі Беларусі". Каталог музеяў. Міністэрства культуры Рэспублікі Беларусь, 2012.